EKOLOGINek Irunen merkataritza eta banaketa jasangarriago eta inklusiboago baterantz egiten du aurrera
Proiektuari esker, irun.market plataforman hobekuntzak bultzatu dira; erregistratutako pertsonen kopurua 110etik 755era igo da, eta paziente zaurgarriei zuzendutako etxez etxeko arreta farmazeutikoko proiektu pilotu bat jarri da abian.
2025 eta 2026 artean garatutako ekimenak tokiko merkataritza, berrikuntza, jasangarritasuna eta inklusioa uztartzen ditu, eta Kutxa Fundazioaren babesa du.
EKOLOGIN proiektuak hiri-banaketako eredu jasangarriago, inklusiboago eta tokiko merkataritzari lotuago baterantz egiten du aurrera, ia bi urteko lanaren ondoren; tarte horretan azterlanak, parte-hartze prozesuak eta zerbitzuen hobekuntzak garatu dira.
Emaitza nagusien artean irun.market plataformaren bilakaera nabarmentzen da, Irungo merkataritzaren online salmentarako plataforma. 2025eko urtarriletik, saltoki aktiboen kopurua 22tik 33ra igo da, eta erregistratutako pertsonena 110etik 755era.
Horri gehitu behar zaio Irungo paziente zaurgarrientzako etxez etxeko arreta farmazeutikoko proiektu pilotua abian jarri izana. Gipuzkoako Farmazialarien Elkargo Ofizialak gidatzen du, eta Irungo Udaleko Gizarte Ongizate eta Berdintasun Arloak eta Osakidetzako Bidasoa ESIak parte hartzen dute.
Proiektuaren aurrerapenak prentsaurreko batean aurkeztu dira, Bidasoa bizirik, Euskadiko Mugikortasun eta Logistika Klusterra, Gipuzkoako Farmazialarien Elkargo Ofiziala eta Kutxa Fundazioko ordezkariekin.
Entzutetik ekintza zehatzetara
EKOLOGIN 2025eko urtarrilean jarri zen abian, tokiko merkataritza sustatzeko, kolektibo zaurgarrien beharrei erantzuteko eta hiri-banaketaren ingurumen-inpaktua murrizteko helburuarekin.
Proiektua Irungo biztanleen erosketa-ohiturei buruzko azterlan batekin eta adinekoekin, desgaitasuna duten pertsonekin eta saltokiekin egindako parte-hartze prozesu batekin hasi zen. Topaketa horietatik hainbat proposamen sortu ziren: leku estrategikoetan online erosketak errazteko laguntza-puntuak jartzea, entregak erabiltzaileen beharretara egokitzea eta etxez etxeko zerbitzu farmazeutikoa sortzea.
irun.market plataformarako hobekuntzak ere identifikatu ziren. Dagoeneko ezarritakoen artean daude ordainketa seguruaren sistema optimizatzea —zenbakizko kode bidezko egiaztapena txertatuta, titularraren nortasuna berresteko eta iruzur posibleak prebenitzeko— eta atxikitako saltokientzat eskuragarri dagoen intranetean interfaze intuitiboago eta egituratuago bat garatzea.
Zifren bilakaerak bultzada hori islatzen du: saltoki aktiboen kopurua % 50 handitu da, eta erregistratutako pertsonen kopurua ia zazpi aldiz biderkatu da. Gainera, eskaerak Badoa tokiko bizikleta bidezko banaketa-enpresaren bitartez banatzen dira, hiri-banaketaren ingurumen-inpaktua murrizten lagunduz.
Etxez etxeko arreta farmazeutikoa
EKOLOGINen emaitza nagusietako bat etxez etxeko arreta farmazeutikoko proiektu pilotua da, kolektibo zaurgarriekin egindako entzute-prozesutik zuzenean sortua.
Zerbitzua ez da sendagaiak eramatera mugatzen: farmazia-langilea bera joaten da etxera medikazioa berrikusteko, atxikidura-arazoak edo hauskortasunarekin, mugikortasunarekin nahiz laguntza faltarekin lotutako zailtasunak antzemateko, eta arreta indibidualizatua ezartzeko.
Ekimen hori Osakidetzako Bidasoa ESIarekin eta udaleko Gizarte Zerbitzuekin koordinatuta garatzen da, osasun- eta gizarte-beharrei modu bateratuan erantzuteko aukera emanez.
Tokiko erosketa eta banaketa jasangarria
EKOLOGINek komunikazio- eta sentsibilizazio-ekintzak ere garatu ditu tokiko erosketa sustatzeko eta kontsumo-ohiturei, eskaeren inpaktuari eta hurbileko merkataritzak hiriaren etorkizunean duen zereginari buruzko hausnarketa bultzatzeko.
2025ean eta 2026an garatutako proiektua Kutxa Fundazioaren erronka ekosozialetarako 2024ko laguntza-deialdiaren barruan kokatzen da, eta lankidetza-sare zabal baten babesa du. Partzuergoa Bidasoa bizirik, Euskadiko Mugikortasun eta Logistika Klusterra, Basque Food Cluster, Badoa, Distribuidora Farmacéutica de Gipuzkoa eta Gipuzkoako Farmazialarien Elkargo Ofizialak osatzen dute. Halaber, erakunde laguntzaile gisa parte hartzen dute Irungo Udalak, Bidasoa ESIak, BDS KOOPek, Sareen Sareak eta Garapenek.
EKOLOGINek, horrela, diagnostikotik eta parte-hartzetik tokiko merkataritza, digitalizazioa, jasangarritasuna eta inklusioa uztartzen dituzten irtenbide zehatzetara egiten du aurrera, hiri hurbilago, irisgarriago eta jasangarriago baten eredua sustatzen laguntzeko helburuarekin.
