Bidasoa bizirik-ek eta Uvescok elikadura-sektorean talentua erakartzeko eta fidelizatzeko formula berrietan aurrera egin dute
Enpresak Erakarbide proiektuaren esparruan egindako lan-saio batean parte hartu du. Saioaren ardatza talentu-beharrak aztertzea eta sektoreko enpresek talentua erakartzeko duten gaitasuna hobetzeko tresnetan aurrera egitea izan da.
Erakarbide Eusko Jaurlaritzaren Enplegu eta Inklusio Berrikuntzarako Euskal Sarearekin, Berritzelanekin, koordinatuta garatutako proiektu traktoreetako bat da. Erakarbide proiektuan Bidasoa bizirik-ek parte hartzen du, Basque Food Cluster, Bilbao Ekintza, Debegesa, Bizkaiko Industria Ingeniarien Elkargo Ofiziala eta Tknikarekin batera.
Helburu nagusia autodiagnostikorako tresna bat sortzea da, Euskadiko elikadura-balio kateak talentua erakartzeko duen gaitasuna ebaluatzeko.
Bidasoa bizirik-ek eta Uvescok lan-saio bat egin dute Berritzelan proiektuaren esparruan, enpresek talentua erakartzeko, txertatzeko eta fidelizatzeko dituzten erronketan sakontzeko eta behar horiei erantzuteko neurriak identifikatzen aurrera egiteko.
Jardunaldiari esker, Uvescoko langileen esperientzia eta ikuspegia partekatu ahal izan dira, eta hainbat alderdi aztertu dira: profesionalak enpresetan sartzeko prozesuak, langileen itxaropenak eta erakundeak ibilbide profesionala garatzeko leku erakargarriago bihurtzen lagun dezaketen enpresa-praktikak, besteak beste.
Saioa testuinguru jakin batean kokatzen da: talentua erakartzea enpresa askoren erronka nagusietako bat bihurtu da. Elikaduraren balio-katearen kasuan, erronka lanpostu hutsak betetzetik harago doa, eta beste hainbat gairekin ere lotuta dago: talentu gaztea erakartzeko gaitasuna, emakumeak sektorean sartzea eta profesionalki aurrera egitea sustatzea, enplegua lortzeko oztopo handiagoak dituzten pertsonei sarbidea erraztea edo lan-aukera erakargarriak ikusgarri egitea.
Bidasoa bizirik-eko presidente Nuria Alzagak nabarmendu duenez, “enpresekin zuzenean lan egiteak aukera ematen digu haien beharrak bertatik bertara ezagutzeko eta, batez ere, erabilgarriak diren eta haien errealitatearekin bat datozen erantzunak bilatzeko. Talentua erakartzea eta fidelizatzea gero eta garrantzitsuagoa da enpresen lehiakortasunerako, eta Bidasoa bizirik-etik eskualdeko enpresa-sareari lagundu nahi diogu erronka horri aurre egiten”.
Talentuaren beharretatik enpresetan aplika daitezkeen irtenbideetara
Saioan, pertsonei entzutean jarri da arreta: beren sektorea beste sektoreekin alderatuta nola ikusten duten, zer alderdi baloratzen dituzten gehien eta abar aztertu dira. Saio hau Erakarbide proiektuaren esparruan profil desberdinetako talentuari entzuteko egingo diren saioen barruan kokatzen da.
Ildo horretan, Bidasoa bizirik-eko presidenteorde Estitxu Urtizbereak adierazi duenez, “horrelako saioak bereziki baliagarriak dira, pertsonei entzuteko eta zer alderdi baloratzen dituzten ezagutzeko aukera ematen dutelako. Informazio hori enpresek beren enplegatzaile-marka hobetu eta talentua erakartzeko har ditzaketen neurri bihur daiteke. Haien beharrei entzutea funtsezkoa da kalitatezko enplegua sortzen lagunduko duten ekimenak bultzatzeko eta gure lurraldeak talentua erakartzeko eta bertan mantentzeko duen gaitasuna indartzeko”.
Enpresen lehiakortasunerako erronka estrategikoa
Lan-ildo horrekin bat, Bidasoa bizirik-ek uda aurretik dihardu eskualdeko enpresei zuzendutako Enplegatzaile Marka eta Talentua Erakartzeko Programan lanean. Programaren helburua da enpresei laguntza eskaintzea enplegatzaile gisa duten ikusgarritasuna eta erakargarritasuna handitzeko, talentua erakartzea eta fidelizatzea erraztuz.
Zehazki, eskualdeko lau ETErekin ari da lanean, bereziki haien gerenteekin edota giza baliabideen arduradunekin. Prozesu egituratu baten bidez, hausnarketa estrategikoa eta aplikazio praktikoa uztartzen dira, talentuarentzako balio-proposamen argi bat eraikitzeko helburuarekin.
Programa honek Gipuzkoako Foru Aldundiaren finantzaketa du.
