Bidasoa bizirik-ek kirola eta enplegua uztartu dituen mugaz gaindiko jardunaldi berritzaile batean parte hartu du Hendaian
France Travail-ek LANEAN proiektuaren esparruan antolatutako “Estadiotik mugaz gaindiko enplegura” ekimenak enpresak eta enplegu bila dabiltzan pertsonak bildu ditu. Jardunaldian, errugbia elkar ezagutzeko eta lanerako gaitasun berriak azaleratzeko tresna izan da.
Bidasoa bizirik-ek irailaren 15ean Hendaian egin den “Estadiotik mugaz gaindiko enplegura” (Du Stade vers l’Emploi Transfrontalier) jardunaldian parte hartu du. France Travail Saint-Jean-de-Luzek antolatu du ekimena, Europako LANEAN proiektuaren esparruan.
Ekimenak 10 enpresa baino gehiago eta 80 parte-hartzaile inguru bildu ditu, eta enpresak eta enplegu bila dabiltzan pertsonak harremanetan jartzeko bestelako modu bat proposatu du: kirola baliatzea elkar ezagutzeko, ohiko hautaketa-prozesu bati ekin aurretik.
Jardunaldia Hendaiako errugbi-estadioan egin da, 08:30etik 16:00etara, eta kirol-jarduerak, elkarrekin egoteko uneak eta lan-arloko topaketak uztartu ditu. Bidasoa bizirik-ek ekimena antolatzen zein garatzen parte hartu du, eta, gainera, taldeetako baten kapitain-lanak egin ditu.
Goizean, enpresek eta hautagaiek errugbiarekin lotutako hainbat kirol-jarduera egin dituzte taldeka. Jarduera horien helburua izan da parte-hartzaileek elkarrekin harremana izatea lan-elkarrizketa baten ohiko testuingurutik kanpo. Jardueren eta elkarrekin egindako bazkariaren ondoren, jardunaldia “job dating” batekin amaitu da, eta enpresek eta hautagaiek enplegura bideratutako topaketak egiteko aukera izan dute. Modu horretan, jardueretan aurrez sortutako harremanak enpresen beharretara egokitzen diren profilak errazago identifikatzen laguntzen du.
Bidasoa bizirik-eko presidente Nuria Alzagak positiboki baloratu du ekimena: “Jardunaldiak erakutsi du badirela enpresak eta enplegu bila dabiltzan pertsonak elkarrengana hurbiltzeko beste modu batzuk. Lehenik kirol-jarduera bat partekatzeak beste abiapuntu batetik harremanak sortzeko aukera ematen du, eta curriculum batean edo ohiko lan-elkarrizketa batean beti antzematen ez diren gaitasunak eta trebetasunak agerian uzten ditu”.
Bestalde, Bidasoa bizirik-eko presidenteorde Estitxu Urtizbereak ekimenaren mugaz gaindiko izaera nabarmendu du bereziki: “LANEANen balio nagusietako bat da gure lurraldea espazio partekatu gisa ulertzea, baita enpleguaren ikuspegitik ere. Horrelako jardunaldiek mugaren bi aldeetako pertsonen, enpresen eta eragileen arteko loturak sortzeko aukera ematen dute, eta mugaz gaindiko lan-merkatu konektatuago baterantz aurrera egiten laguntzen dute”.
Kirola, talentua azaleratzeko tresna
“Estadiotik enplegura” ekimenaren berezitasunetako bat da enpresek eta hautagaiek, hasieran, baldintza berberetan parte hartzen dutela kirol-jardueretan. Horrek harreman naturalagoa sortzen laguntzen du, eta talde-lana, komunikazioa, egokitzeko gaitasuna, lankidetza edo ekimena bezalako gaitasunak behatzeko aukera ematen du.
Deialdia adin eta jatorri desberdinetako hautagaiei irekita egon da, eta jarduerak pertsona guztientzat irisgarriak izateko diseinatu dira. Kirol-dinamikak eta bazkaria elkarrekin partekatu ondoren, parte-hartzaileek eta enpresek goizean sortutako harremana lan-arlora eraman dute “job dating” saioaren bidez.
LANEAN proiektuaren esparruko ekimena
Bidasoa bizirik-en parte-hartzea LANEAN proiektuaren barruan egiten duen lanaren parte da. Proiektuaren helburua enpleguaren arloko lankidetza sustatzea eta mugaz gaindiko lurraldean lan-aukerak bultzatzea da.
Hendaiako jardunaldia, beraz, mugaren bi aldeetako talentua eta enpresak elkarrengana hurbiltzeko beste ekintza bat izan da, hautaketa-eredu berriak probatzeko eta enpleguaren arloan lan egiten duten eragileen arteko lankidetza indartzeko.
LANEAN proiektuak % 65eko finantzaketa jasotzen du Europar Batasunetik, Interreg VI-A Espainia-Frantzia-Andorra Programaren (POCTEFA 2021-2027) AFOMEF POCTEFA deialdiaren bidez. Programa horren helburua Espainia-Frantzia-Andorra mugaz gaindiko eremuaren integrazio ekonomikoa eta soziala indartzea da.
