LANEAN sendotu egin da bigarren edizioan, 51 enpresa parte-hartzailerekin eta 500 lanpostu baino gehiagorekin

Lanean Mugaz Gaindiko II. Enplegu Azokak bere bigarren edizioa itxi du, Gipuzkoa, Nafarroa eta Akitania Berrian lan bila dabiltzan enpresa eta pertsonen arteko erreferentziazko topagune gisa finkatuz. Irun eta Hondarribiko Udalek, Bidasoa Bizirik elkartearen bidez eta Euroeskualdearekin batera antolatutako jardunaldiak 51 enpresa parte-hartzaile bildu zituen Ficoban. Guztira, 161 lan-eskaintza eta 508 lanpostu bakante eskaini zituzten.

Goiz osoan zehar, ehunka lagunek aukera izan zuten ostalaritza, industria, elikadura, merkataritza edo zerbitzu sektoreetako enpresekin zuzeneko elkarrizketak eta kontaktuak mantentzeko, horrez gain, mugaz gaindiko enpleguari buruzko orientazioa eta informazioa jasotzeko.

Bidasoa bizirik-ek oso positibotzat jotzen ditu bigarren edizio honetan lortutako emaitzak, aurreko urteko zifrak hobetzen baititu eta enpresen zein parte-hartzaileen interesa berresten baitu zuzeneko topaketa formatu honetan.

“LANEAN tresna eraginkor gisa finkatzen ari da talentua eta enpresak mugaz gaindiko lurraldean konektatzeko. Parte-hartze datuek eta enpresek zein bertaratutako pertsonek erakutsitako interesak erakusten dute honelako topaguneak sortzeko benetako beharra dagoela”, adierazi du Nuria Alzaga Bidasoa bizirik-eko presidenteak.

Bestalde, Estitxu Urtizberea Bidasoa bizirik-eko presidenteordeak nabarmendu duenez, “azoka honek enplegagarritasuna sustatzeko eta mugaz bi aldeetako lan aukera berriak ahalbidetzeko elkarrekin egiten dugun lana indartzen du, baita lurraldeen arteko lankidetza sustatu ere”.

Parte hartu duten enpresek ere oso positiboki baloratu dute esperientzia. Olatz Martikoko ordezkariak adierazi duenez, “guretzat ohore bat da bilatzen ditugun profilekin bat egiten duten pertsonak leku eta egun berean elkarrizketatu eta ezagutu ahal izatea. Gainera, oso profil interesgarriak aurkitu ditugu, gure enpresarekin bat datozenak”.

Bertaratutakoek ekimenaren balio praktikoa ere azpimarratu zuten. Martak, azokan lehen aldiz parte hartu zuenak, azaldu zuenez, “oso interesgarria iruditu zait leku berean eta egun berean hainbat enpresa ezagutu eta haiekin elkarrizketatu ahal izatea, asko errazten duelako zuzeneko kontaktua eta, beharbada, beste modu batean aurkituko ez nituzkeen aukerak ezagutzea”.

Elkarrizketen tarteez gain, Lanean Azokak, lan-orientazioko zerbitzuak, mugaz gaindiko enpleguari buruzko informazioa eta curriculumak inprimatzeko laguntza eskaini zituen, baita argazkilari profesional baten zerbitzuak ere. Horrela, enplegagarritasuna hobetzeko eta herritarrei lan-aukera errealak hurbiltzeko helburua indartu zuen.

Lanean Mugaz Gaindiko II. Enplegu Azoka POCTEFA EFA154/04 europar proiektuaren parte da eta Euskadi, Nafarroa eta Akitania Berriaren arteko integrazio ekonomiko eta soziala indartzen jarraitzea du helburu.