Eskualdeko 20 agente turistiko Turismo jasangarri eta arduratsuarekiko konpromisoa erakusten dute
- Turismo-enpresek Euskadiko Turismoaren Kode Etikoaren atxikimendua berritu dute
Irun eta Hondarribiko Udalek, Bidasoa biziriken bidez, eskualdeko 20 turismo-agenteri ziurtagiri bana eman diete gaur, Euskadiko Turismoaren Kode Etikoarekiko atxikimendua aitortzen diena. Basquetour, Euskal Turismoaren Agentziaren programa bat, Irun eta Hondarribiko turismo sektorean garatua, Bidasoa aktibarekin elkarlanean.
Aitorpen horien banaketa-ekitaldia gaur goizean izan da Hondarribiko Hotel Jaureguitan, eta urte osoan zehar ekimen honekin duten konpromisoa berritzen lan egin duten erakundeetako ordezkariek hartu dute parte. Haiekin batera izan dira Bidasoa bizirikeko presidentea, Nuria Alzaga, eta lehendakariordea, Estitxu Urtizberea.
Bere hitzaldian, Alzagak azpimarratu du “eskualdeko turismo-agentek kalitatearekiko eta praktika onekiko duten konpromisoa, turismo-eredu iraunkor baten alde egindako apustu partekatua islatzen duena, bisitatzen gaituzten pertsonei ez ezik, hemen bizi garenoi ere onura ekarriko diena”. Zentzu horretan, gaineratu du: “zoriondu egin behar ditugu turismo-agente hauek, komunitateari onura handiagoak ekarriko dizkion turismoa ulertzeko modu baten aldeko konpromisoa erakutsi dutelako”.
Bestalde, Estitxu Urtizbereak adierazi du “helburua dela eskualdean turismo iraunkor eta arduratsua sustatzea, bisitatzen gaituzten pertsonen eta hemen bizi direnen arteko bizikidetza ona lortzeko”.
Bidasoa biziriken zeregina da turismo-industriaren garapen lehiakorra, arduratsua eta iraunkorra bultzatzea, prozesu honetan inplikatutako agenteek beren eguneroko jardunean hartutako konpromisoak aplikatzeko pausoak ematea sustatuz.
Protagonistak
Kode Etikoaren bereizgarri hau jaso duten enpresak honako hauek dira: Hotel Jauregui, Villa Magalean Hotel & Spa, Bidatour, Ekoetxea Txingudi, Parking Jaizubia, Marei Azafatas, Iketetxe landa etxea, Navegavela, Jolaski, Atalaia jatetxea, Oiasso Museoa, ETH Irun Hotela, Atalaia Hotela, Pensión Europa, Aitana Hotela, Feel Basque Country, Kayak Basque Country, Ana Belén Rodríguez, Ipar Adventure eta Bidasoa bizirik agentzia bera.
Enpresa horiek guztiek aurrera egin dute Euskadiko Kode Etikoak ezartzen duen prestakuntza- eta konpromiso-ibilbidean, eta hainbat sentsibilizazio-, prestakuntza- eta laguntza tekniko-saioetan parte hartu dute, azken akreditazioa eta Euskadiko Turismoaren Kode Etikoari atxikitako erakundeen bereizgarria lortzeko. Gainera, Euskadiko Turismoaren Etika Erregistroaren parte dira.
Hotel Jaureguiko ordezkariek adierazi dute: “Gure kode etikoarekiko konpromisoa hotelaren kultura antolatzailaren parte da; konfiantzan oinarritutako harreman pertsonal eta profesionalak bultzatzea eta arlo guztietan praktika iraunkorren aldeko apustua dira gure jardunaren oinarriak”.
Kode Etikoaren oinarrizko printzipioak
Erakunde turistikoek Kode hau sinatzean eskualdeko kultura, tokiko tradizioak eta ondare kulturala errespetatzeko eta zaintzeko konpromiso garrantzitsu bat hartzen dute. Horrez gain, turisten eskubideak, haien berezitasunak, bizimoduak, gustuak, itxaropenak, sinesmenen aniztasuna eta abar errespetatzeko konpromisoa hartzen dute.
Bestalde, Kodeak azpimarratzen du turismoarekin lotutako jarduerek genero berdintasuna, inklusioa eta tolerantzia errespetatu behar dituztela, baita ingurumen-iraunkortasuna ere, denboralditasunaren murrizketaren bidez eta ekoturismoa eta natura-turismoa sustatuz, ondare naturala eta ekosistemak errespetatuz.
Euskadiko Turismoaren Kod e Etikoak Turismoaren Mundu Erakundearen mundu-mailako kode etikoaren printzipioak eta Nazio Batuen 2030 Agendaren Garapen Iraunkorreko Helburuak egokitzen ditu.
Helmuga Turistiko Adimenduna
Euskadiko Turismoaren Kode Etikoarekiko atxikimendu kolektibo honek bat egiten du Irunek eta Hondarribiak garatzen ari diren Helmuga Turistiko Adimendunaren estrategiarekin. Eredu horrek iraunkortasunean, berrikuntzan, irisgarritasunean eta gobernantza partekatuan du oinarria. Jarduera turistikoan balio etikoak txertatzeak helmugaren lehiakortasuna sendotzeaz gain, etorkizuneko erronkei aurre egiteko gaitasuna indartzen du, turismo arduratsuaren printzipioak modu koherentean integratuz, pertsonetan oinarritutako kudeaketa adimendun baten baitan.
