Bidasoa bizirik-ek Helmuga turistiko jasangarri eta inklusiboaren Euskadi Saria jaso du
Bidasoa bizirik-ek Helmuga Arduratsu eta Iraunkorraren Euskadi Saria jaso du, Eusko Jaurlaritzak Euskadi Turismo Sarien barruan ematen dituen lau sarietako bat. Errekonozimendu honek eskualdeko erakundeak turismo jasangarriago, inklusiboago eta lehiakorrago baten alde egiten duen lana balioan jartzen du, Euskadiko helburu estrategikoekin bat datorrena.
Saria Nuria Alzaga Bidasoa bizirik-eko presidenteak jaso du, ostegun honetan, azaroaren 20an, Gasteizen egindako zeremonia ofizialean.
Turismo jasangarri eta kalitatezkoaren alde egindako lana aintzat hartzea
Euskadi Turismo Sariek berrikuntzan, jasangarritasunean eta turismoaren bikaintasunean laguntzen duten erakundeak, enpresak eta profesionalak saritzen dituzte. Helmuga arduratsu eta jasangarria kategorian, epaimahaiak irizpide sozial, ingurumeneko eta ekonomikoak barne hartzen dituzten ekimenekiko konpromisoa eta irisgarritasuna eta berdintasuna sustatzea baloratzen ditu.
Arlo horretan, Bidasoa bizirik-ek azken urteotan indartu egin du turismo-eredu orekatu baterako bere ibilbide-orria, herritarren bizi-kalitatearekin eta bisitarien esperientziaren etengabeko hobekuntzarekin konprometitua.
Saria jaso ondoren, Nuria Alzagak, Bidasoa bizirik-eko presidenteak nabarmendu duenez, “sari hau lankidetza publiko-pribatuaren eta eskualdearen etengabeko lanaren errekonozimendua da, helmuga arduratsu, jasangarri eta lehiakor gisa finkatu delako. Bidasoa bizirik-etik gure eskaintza turistikoa hobetuko duten eta lurraldearen ongizateari lagunduko dioten ekimenak bultzatzen jarraituko dugu”.
Estitxu Urtizbereak, Bidasoa bizirik-eko presidenteordeak, berriz, hau azpimarratu du: “Iraunkortasuna benetako konpromisoa da, eta Bidasoako enpresa eta erakundeek partekatzen dute. Sari honek digitalizazioan, irisgarritasunean eta berrikuntzan aurrera egiten jarraitzera animatzen gaitu, horiek baitira herritarrak eta tokiko ondarea errespetatuko dituen kalitatezko turismoa eskaintzeko gakoak”.
Desestazionalizazioarekin eta iraunkortasunarekin konpromezua
Bidasoa bizirik-ek etengabe lan egiten du turismoaren urtarokotasuna gainditzeko, urte osoan zehar jarduera turistikoa indartzeko asmoz. Ildo horretan, eskualdeko enpresek negozio-turismora (MICE) bideratutako produktu eta pakete berriak bultzatu dituzte, eskualdeak eskaintzen dituen loturak eta zerbitzuak aprobetxatuz.
Aldi berean, gero eta turismo-enpresa gehiagok jasangarritasunarekiko konpromisoa indartu dute, energia-eraginkortasuna eta karbono-aztarnaren murrizketa ardatz dituen kode etiko bati atxikita. Ekintza hauek estrategia komun baten parte dira, Bidasoa helmuga arduratsu, berritzaile eta bere ingurunearekiko errespetuzko gisa kokatzea bilatzen duena.
Helmuga Turistiko Adimendun eta Jasangarri (DTI) baterako aurrerapausoak
Sariaren testuinguruan, Bidasoa bizirik-ek Helmuga Turistiko Adimendunaren (DTI) estrategia ezartzen jarraitzen du, jasangarritasunaren, digitalizazioaren, berrikuntzaren, irisgarritasunaren eta gobernantzaren oinarriak integratzen dituena.
Proiektu honen baitan, enpresa berriek ere bat egin dute berriki ekimenarekin, eskualdeko sektore turistikoaren eraldaketa digitalean aurrera egiteko elkarlana zabalduz. Programak tresna berritzaileak eskaintzen ditu, helburu hauekin:
- Bisitarien esperientzia hobetzea.
- Baliabide turistikoak modu eraginkorrean optimizatzea.
- Natura- eta kultura-ingurunea errespetatzen duen garapen-eredu orekatua bermatzea.
Errekonozimendu hau bultzada bat da Bidasoa bizirik-eko estrategia-turistikoarentzat eta eskualdeak turismo jasangarri, inklusibo eta kalitatezkoarekin duen konpromisoa berresten du.
